សុវត្ថិភាពរបស់អ្នក

យើងកំណត់សុវត្ថិភាពរបស់អ្នកជាចំណុចអាទិភាពសម្រាប់សកម្មភាពទាំងឡាយដែលយើងអនុវត្ត។

ប្រសិនបើព័ត៌មានរបស់អ្នកមិនមានសុវត្ថិភាព វាមិនមានលក្ខណៈឯកជននោះទេ។ ហេតុដូច្នេះហើយយើងធ្វើឲ្យប្រាកដថាសេវាកម្ម Google ដូចជា៖ ស្វែងរក, ផែនទី, និង YouTube ជាដើមត្រូវបានការពារដោយហេដ្ឋារចនាសម្ព័ន្ធសុវត្ថិភាពកម្រិតខ្ពស់បំផុតមួយនៅក្នុងពិភពលោក។

ការអ៊ិនគ្រីបរក្សាទិន្នន័យរបស់អ្នកឲ្យមានសុវត្ថិភាពនៅពេលឆ្លងកាត់បណ្តាញ

ការអ៊ិនគ្រីបផ្តល់នូវកម្រិតសុវត្ថិភាព និងភាពឯកជនខ្ពស់ជាងមុនសម្រាប់សេវាកម្មរបស់យើង។ នៅពេលដែលអ្នកធ្វើសកម្មភាពដូចជា៖ ផ្ញើអ៊ីមែល, ចែករំលែកវីដេអូ, ចូលទៅកាន់គេហទំព័រ, ឬផ្ទុករូបថតរបស់អ្នក នោះទិន្នន័យដែលអ្នកបង្កើតធ្វើការផ្លាស់ទីរវាងឧបករណ៍, សេវាកម្ម Google, និងមជ្ឈមណ្ឌលទិន្នន័យរបស់យើង។ យើងការពារទិន្នន័យនេះដោយប្រើស្រទាប់សុវត្ថិភាពជាច្រើន ដោយរាប់បញ្ចូលទាំងបច្ចេកវិទ្យាអ៊ិនគ្រីបឈានមុខដូចជា៖ HTTPS និង Transport Layer Security។

ហេដ្ឋារចនាសម្ព័ន្ធក្លោតរបស់អ្នកការពារទិន្នន័យរបស់អ្នកគ្រប់ពេល 24/7

មិនថាជាមជ្ឈមណ្ឌលទិន្នន័យដែលត្រូវបានរចនាឡើងជាលក្ខណៈផ្ទាល់ខ្លួន ឬខ្សែបញ្ជូនក្រោមបាតសមុទ្រដែលបញ្ជូនទិន្នន័យពីទ្វីបមួយទៅកាន់ទ្វីបមួយទៀតទេ Google ដំណើរការលើហេដ្ឋារចនាសម្ព័ន្ធបច្ចេកវិទ្យាក្លោតដែលមានសុវត្ថិភាព និងជឿទុកចិត្តបំផុតមួយនៅក្នុងពិភពលោក។ វាបន្តត្រួតពិនិត្យជានិច្ចដើម្បីការពារទិន្នន័យរបស់អ្នក និងផ្តល់ជូនឲ្យអ្នកនៅពេលដែលអ្នកត្រូវការ។ ជាការពិតណាស់ យើងចែកចាយទិន្នន័យទៅកាន់មជ្ឈមណ្ឌលទិន្នន័យជាច្រើន ដូច្នេះក្នុងករណីដែលមានអគ្គីភ័យ ឬគ្រោះមហន្តរាយកើតឡើង វាអាចផ្ទេរដោយស្វ័យប្រវត្តិ និងដោយរលូនទៅកាន់តំបន់ដែលមានស្ថិរភាព និងសុវត្ថិភាព។

ការសង្កេតមើលពីការគំរាមកំហែងជួយការពារសេវាកម្មរបស់យើង

យើងបន្តត្រួតពិនិត្យសេវាកម្មរបស់យើង និងហេដ្ឋារចនាសម្ព័ន្ធដែលមានសារៈសំខាន់ជានិច្ចដើម្បីការពារវាពីការគំរាមកំហែង ដោយរាប់បញ្ចូលទាំងសារឥតបានការ កម្មវិធីបង្កការខូចខាត មេរោគ និងទម្រង់កូដដែលបង្ករគ្រោះថ្នាក់ផ្សេងទៀត។

យើងមិនផ្តល់លទ្ធភាពចូលដំណើរការទិន្នន័យដោយផ្ទាល់ទៅរដ្ឋាភិបាលនោះទេ

និយាយឲ្យចំទៅ យើងមិនផ្តល់លទ្ធភាពចូលដំណើរការ “សម្ងាត់” ទៅកាន់ទិន្នន័យរបស់អ្នក ឬម៉ាស៊ីនមេរបស់យើង ដែលផ្ទុកទិន្នន័យរបស់អ្នកនោះទេ។ វាមានន័យថាគ្មានស្ថាប័នរដ្ឋាភិបាល សហរដ្ឋអាមេរិក ឬស្ថាប័នផ្សេងទៀតណាមួយមានលទ្ធភាពចូលដំណើរការព័ត៌មានរបស់អ្នកប្រើរបស់យើងបានដោយផ្ទាល់នោះឡើយ។ មានពេលខ្លះ នៅពេលដែលយើងបានទទួលសំណើសុំទិន្នន័យអ្នកប្រើពីភ្នាក់ងារច្បាប់ ក្រុមការងារផ្នែកច្បាប់របស់យើងពិនិត្យមើលសំណើសុំទាំងនេះ ហើយបដិសេធក្នុងករណីដែលសំណើសុំមានទំហំធំពេក ឬមិនអនុលោមទៅតាមដំណើរការត្រឹមត្រូវ។ យើងបានខិតខំប្រឹងប្រែងយ៉ាងខ្លាំងដើម្បីបើកចំហរអំពីសំណើសុំទិន្នន័យទាំងនេះនៅក្នុងរបាយការណ៍តម្លាភាពរបស់យើង។

សុវត្ថិភាពត្រូវបានបំពាក់នៅក្នុងសេវាកម្មទាំងអស់របស់យើង

មិនថាជាការអាប់ដេតកម្មវិធីដោយស្វ័យប្រវត្តិ ឬកម្មវិធីរារាំងសារឥតបានការនោះទេ សេវាកម្ម Google ត្រូវបានរចនាឡើងដោយបំពាក់ជាមួយសុវត្ថិភាពចាប់ពីចំណុចស្នូល។

ការអ៊ិនគ្រីបពង្រីកចេញពីរូបភាពទូអេហ្វែល

ការអ៊ិនគ្រីប Gmail រក្សាអ៊ីមែលជាលក្ខណៈឯកជន

ចាប់តាំងពីថ្ងៃដំបូងមក Gmail គាំទ្រការតភ្ជាប់ដែលមានការអ៊ិនគ្រីប ដែលធ្វើឲ្យជនខិលខូចពិបាកក្នុងការអានអ្វីដែលអ្នកបានផ្ញើ។ Gmail ក៏ព្រមានអ្នកអំពីហានិភ័យផ្នែកសុវត្ថិភាពដែលនឹងអាចកើតមានផងដែរ ដូចជានៅពេលដែលអ្នកទទួលអ៊ីមែលដែលត្រូវបានផ្ញើដោយមិនមានការអ៊ិនគ្រីប។

សំបុត្រអ៊ីមែលរបស់ Gmail បង្ហាញសញ្ញាព្រមានពីឧបរកណ៍ស្កេនផ្នែកសុវត្ថិភាព

ការការពារសារឥតបានការសម្រាប់ Gmail ត្រងសារដែលគួរឲ្យសង្ស័យចេញ

មេរោគ និងការវាយប្រហារដោយការលួចបន្លំជាច្រើនផ្តើមចេញពីអ៊ីមែល។ សុវត្ថិភាព Gmail ការពារអ្នកពីសារឥតបានការ ការលួចបន្លំ និងមេរោគបានប្រសើរជាងសេវាកម្មអ៊ីមែលដ៏ទៃទៀត។ Gmail វិភាគលើគំរូដែលបានមកពីសាររាប់ពាន់លាន ដើម្បីកំណត់លក្ខណៈនៃអ៊ីមែលដែលអ្នកប្រើសម្គាល់ថាសារឥតបានការ បន្ទាប់មកប្រើការសម្គាល់ទាំងនោះដើម្បីរារាំងអ៊ីមែលដែលគួរឲ្យសង្ស័យ និងគ្រោះថ្នាក់ មុនពេលដែលវាទៅដល់អ្នក។ អ្នកអាចជួយបានដោយជ្រើស "រាយការណ៍ពីសារឥតបានការ" ចំពោះអ៊ីមែលដែលគួរឲ្យសង្ស័យដែលអ្នកបានទទួល។

ការសិក្សាដោយម៉ាស៊ីន និងភាពឆ្លាតវៃបែបសិប្បនិមិត្តជួយឲ្យតម្រងត្រងសារឥតបានការរបស់ Gmail ដំណើរការបានត្រឹមត្រូវជាងមុន។ ឥឡូវនេះវាទប់ស្កាត់សារឥតបានការ 99.9% ចេញពីប្រអប់សំបុត្ររបស់អ្នក។

កម្មវិធីរុករក Chrome ជាមួយដំណើរការអាប់ដេតផ្នែកសុវត្ថិភាព

Chrome អាប់ដេតសុវត្ថិភាពកម្មវិធីរុករករបស់អ្នកដោយស្វ័យប្រវត្តិ

បច្ចេកវិទ្យាសុវត្ថិភាពតែងតែមានការផ្លាស់ប្តូរជានិច្ច ដូច្នេះការរក្សាសុវត្ថិភាពមានន័យថាជាការបន្តធ្វើការអាប់ដេត។ ហេតុដូច្នេះហើយបានជាកម្មវិធី Chrome ពិនិត្យយ៉ាងទៀងទាត់ដើម្បីប្រាកដថាកំណែកម្មវិធីរុករកដែលអ្នកកំពុងប្រើមានការអាប់ដេតជាមួយនឹងដំណោះស្រាយផ្នែកសុវត្ថិភាពចុងក្រោយបំផុត, ការការពារពីមេរោគ និងគេហទំព័របោកបញ្ឆោត, និងចំណុចជាច្រើនទៀត។ កម្មវិធី Chrome អាប់ដេតដោយស្វ័យប្រវត្តិ ដូច្នេះអ្នកអាចទទួលបានបច្ចេកវិទ្យាសុវត្ថិភាព Chrome ចុងក្រោយបំផុតដើម្បីការពារអ្នក។

កម្មវិធីបង្កគ្រោះថ្នាក់ឆ្មក់ចូលក្នុងឧបករណ៍

Google Play ទប់ស្កាត់កម្មវិធីដែលអាចនឹងបង្កគ្រោះថ្នាក់ពីទូរស័ព្ទរបស់អ្នក

ភាពងាយរងគ្រោះផ្នែកសុវត្ថិភាពដ៏ធំបំផុតមួយរបស់យើងនៅលើឧបករណ៍របស់អ្នកអាចបណ្តាលមកពីកម្មវិធីដែលអ្នកដំឡើងនៅលើឧបករណ៍នោះ។ ប្រព័ន្ធសង្កេតមើលរបស់យើងដាក់ទុងលើកម្មវិធីដែលអាចនឹងបង្កគ្រោះថ្នាក់ មុនពេលដែលវាឈានទៅដល់ហាង Play។ ប្រសិនបើយើងមិនប្រាកដថាកម្មវិធីណាមួយមានសុវត្ថិភាពឬអត់ កម្មវិធីនោះត្រូវបានពិនិត្យមើលដោយសមាជិកនៃក្រុមសុវត្ថិភាព Android។ នៅពេលដែលយើងសម្រិតសម្រាំងប្រព័ន្ធសង្កេតមើលរបស់យើង យើងវាយតម្លៃកម្មវិធីដែលមាននៅលើ Google Play ឡើងវិញ ហើយយកកម្មវិធីទាំងឡាយដែលអាចបង្កគ្រោះថ្នាក់ចេញ ដួច្នេះវានឹងមិនអាចឈានទៅដល់ឧបករណ៍របស់អ្នកទេ។

Google រារាំងការផ្សាយពាណិជ្ជកម្មដែលបង្កគ្រោះថ្នាក់ និងក្លែងបន្លំ

បទពិសោធន៍ប្រើប្រាស់អ៊ីនធឺិណិតរបស់អ្នកអាចត្រូវបានបំផ្លាញដោយពាណិជ្ជកម្មដែលមានមេរោគ, បិទបាំងមាតិកាដែលអ្នកកំពុងមើល ផ្សព្វផ្សាយទំនិញក្លែងក្លាយ, ឬសកម្មភាពផ្សេងទៀតដែលបំពានគោលការណ៍ផ្សាយពាណិជ្ជកម្មរបស់យើង។ យើងយកចិត្តទុកដាក់លើបញ្ហានេះយ៉ាងខ្លាំង។ ជារៀងរាល់ឆ្នាំ ការរួមបញ្ចូលគ្នារវាងអ្នកពិនិត្យមើលផ្ទាល់ និងកម្មវិធីទាន់សម័យរបស់យើងរារាំងពាណិជ្ជកម្មដែលមិនល្អជិតមួយពាន់លាន។ យើងក៏ផ្តល់ជូនដល់អ្នកនូវឧបករណ៍ដើម្បីរាយការណ៍ពីពាណិជ្ជកម្មដែលប្រមាថ និងគ្រប់គ្រងប្រភេទពាណិជ្ជកម្មដែលអ្នកមើលឃើញផងដែរ។ បន្ថែមពីនេះទៀត យើងបានបោះផ្សាយនូវការយល់ដឹង និងការអនុវត្តដ៏ល្អបំផុតរបស់យើងយ៉ាងសកម្ម ដើម្បីជួយធ្វើឲ្យបណ្តាញអ៊ីនធឺណិតមានសុវត្ថិភាពជាងមុនសម្រាប់អ្នករាល់គ្នា។

គន្លឹះសំខាន់ៗដើម្បីជួយរក្សាសុវត្ថិភាពរបស់អ្នកនៅលើអ៊ីនធឺណិត

រក្សាសុវត្ថិភាពគណនីលើអ៊ីនធឺណិត និងទិន្នន័យផ្ទាល់ខ្លួនរបស់អ្នកដោយប្រើគន្លឹះងាយៗទាំងនេះ។

  • ការពារឧបករណ៍របស់អ្នក

  • ជៀសវាងការប៉ុនប៉ងដាក់នុយ

  • រុករកលើអ៊ីនធឺណិតដោយសុវត្ថិភាព

របាំងសុវត្ថិភាព Google និងបញ្ជីផ្ទៀងផ្ទាត់

បង្កើតពាក្យសម្ងាត់រឹង​មាំ

ការបង្កើតពាក្យសម្ងាត់ដែលរឹង​មាំ និងមានសុវត្ថិភាពគឺជាជំហានដ៏សំខាន់បំផុត ដែលអ្នកអាចប្រើជាប្រយោជន៍ក្នុងការការពារគណនីលើអ៊ីនធឺណិតរបស់អ្នក។ អ្នកអាចធ្វើដូច្នេះបានដោយប្រើបណ្តុំពាក្យដែលអ្នកមិនភ្លេច ប៉ុន្តែអ្នកផ្សេង​ពិបាកនឹងទាយត្រូវ។ ឬបង្កើតប្រយោគវែងមួយ រួចបង្កើតពាក្យសម្ងាត់ដោយប្រើតួអក្សរដំបូងនៃពាក្យនីមួយៗ។ ដើម្បីឱ្យពាក្យសម្ងាត់នោះកាន់តែរឹង​មាំ សូមបង្កើតវាឱ្យបានយ៉ាងតិច 8 តួ ពីព្រោះពាក្យសម្ងាត់កាន់តែវែងគឺកាន់តែ​មានភាពរឹងមាំ។

ប្រសិនបើអ្នកត្រូវបានស្នើឱ្យផ្តល់ចម្លើយសម្រាប់សំណួរសុវត្ថិភាព សូមពិចារណាផ្តល់ចម្លើយក្លែងក្លាយដើម្បីធ្វើឱ្យចម្លើយនោះកាន់តែពិបាកទាយ។

កុំប្រើពាក្យសម្ងាត់ដដែលពីរដងឱ្យសោះ

ប្រើពាក្យសម្ងាត់ខុសៗ​គ្នាសម្រាប់គណនីនីមួយៗ

ការប្រើពាក្យសម្ងាត់តែមួយសម្រាប់ចូលគណនីច្រើន ដូចជាសម្រាប់គណនី Google កម្រងព័ត៌មានបណ្តាញសង្គម និងគេហទំព័រលក់ទំនិញរបស់អ្នក នឹងបង្កឱ្យ​ហានិភ័យកាន់តែខ្ពស់ចំពោះសុវត្ថិភាពរបស់អ្នក។ វាមិនខុសពីការប្រើកូនសោតែមួយសម្រាប់ចាក់សោផ្ទះ រថយន្ត និងការិយាល័យរបស់អ្នកនោះទេ ពោលគឺប្រសិនបើមាន​នរណា​ម្នាក់មាន​លទ្ធភាពចូល​គណនីមួយហើយ គេក៏​នឹង​អាចចូលគណនី​ផ្សេងទៀតបានផងដែរ។

តាមដានពាក្យសម្ងាត់ច្រើន

កម្មវិធីគ្រប់គ្រងពាក្យសម្ងាត់ដូចជា Smart Lock របស់ Google នៅក្នុងកម្មវិធីរុករកតាមអ៊ីនធឺណិត Chrome ជួយអ្នកក្នុងការការពារ និងតាមដានពាក្យសម្ងាត់ទាំងអស់សម្រាប់គណនីលើអ៊ីនធឺណិតដែលខុសៗ​គ្នារបស់អ្នក។ វាថែមទាំងអាចតាមដានចម្លើយរបស់អ្នកសម្រាប់សំណួរសុវត្ថិភាព និងបង្កើតពាក្យសម្ងាត់ចៃដន្យសម្រាប់អ្នកផងដែរ។

ទប់ទល់នឹងអ្នកលួចចូលប្រើដោយប្រើការផ្ទៀងផ្ទាត់ 2 ជំហាន

ការផ្ទៀងផ្ទាត់ 2 ជំហានជួយទប់ស្កាត់បុគ្គលដែលមិនគួរមានសិទ្ធិចូលប្រើគណនីរបស់អ្នក ដោយតម្រូវឱ្យអ្នកប្រើកត្តាបន្ទាប់បន្សំបន្ថែមពីលើឈ្មោះអ្នកប្រើប្រាស់ និងពាក្យសម្ងាត់ដើម្បីចូលគណនីរបស់អ្នក។ ឧទាហរណ៍ សម្រាប់ Google វាអាចជាលេខកូដប្រាំមួយខ្ទង់ដែលបង្កើតដោយកម្មវិធីផ្ទៀងផ្ទាត់ Google ឬសារជំរុញនៅក្នុងកម្មវិធី Google របស់អ្នក ដើម្បីទទួលយកការចូលពីឧបករណ៍ដែលទុកចិត្ត។

សម្រាប់ការការពារបន្ថែមប្រឆាំងនឹងការដាក់នុយ អ្នកអាចប្រើសោសុវត្ថិភាពដែលដោតទៅក្នុងរន្ធ USB នៃកុំព្យូទ័ររបស់អ្នក ឬភ្ជាប់ទៅឧបករណ៍ចល័តរបស់អ្នកដោយប្រើ NFC (ទំនាក់ទំនងនៅជិត) ឬប៊្លូធូស។

រក្សាឱ្យ​កម្មវិធី​របស់អ្នកមាន​កំណែថ្មី​ជានិច្ច

ដើម្បីការពារខ្លួនអ្នកពីភាពងាយរងគ្រោះផ្នែកសុវត្ថិភាព សូមប្រើកម្មវិធីដែលមានកំណែថ្មីបំផុតជានិច្ចនៅលើប្រព័ន្ធប្រតិបត្តិការកម្មវិធីរុករកតាមអ៊ីនធឺណិត កម្មវិធីជំនួយ ឬកម្មវិធីកែឯកសារ។ នៅពេលដែលអ្នកទទួលបានការជូនដំណឹងអំពីការដំឡើងជំនាន់កម្មវិធីរបស់អ្នកហើយ សូមដំឡើងឱ្យបានឆាប់តាមដែលអាចធ្វើបាន។

ពិនិត្យមើលកម្មវិធីដែលអ្នកប្រើជាទៀងទាត់ ដើម្បីប្រាកដថាអ្នកកំពុងដំណើរការកំណែថ្មីបំផុតជានិច្ច។ សេវាកម្មមួយចំនួន រួមទាំងកម្មវិធីរុករកតាមអ៊ីនធឺណិត Chrome នឹងធ្វើការដំឡើងជំនាន់ដោយស្វ័យប្រវត្តិ។

ប្រើការចាក់សោអេក្រង់

នៅពេលដែលអ្នកមិនប្រើកុំព្យូទ័រ កុំព្យូទ័រយួរដៃ ថេប្លេត ឬទូរសព្ទ សូមចាក់សោអេក្រង់ ដើម្បីកុំឱ្យអ្នកផ្សេងចូលប្រើឧបករណ៍របស់អ្នក។ ដើម្បីសុវត្ថិភាពបន្ថែម សូមកំណត់ឱ្យឧបករណ៍របស់អ្នកចាក់សោដោយស្វ័យប្រវត្តិ នៅពេលដែលវាដេក។

ចាក់សោទូរសព្ទរបស់អ្នក ប្រសិនបើអ្នកបាត់វា

ក្នុងករណីដែលទូរសព្ទរបស់អ្នកបាត់ ឬត្រូវបានគេលួច សូមចូលទៅកាន់គណនីរបស់ខ្ញុំ រួចជ្រើសរើស “ស្វែងរកទូរសព្ទរបស់ខ្ញុំ” ដើម្បីការពារទិន្នន័យរបស់អ្នកដោយអនុវត្តតាម​ពីរបីជំហានងាយៗ​។ មិនថាអ្នកមានឧបករណ៍ដែលប្រើប្រព័ន្ធ Android ឬ iOS នោះទេ អ្នកអាចកំណត់ទីតាំង និងចាក់សោទូរសព្ទរបស់អ្នកពីចម្ងាយបាន ដើម្បីកុំឱ្យអ្នកផ្សេងអាចប្រើទូរសព្ទ និងចូលប្រើព័ត៌មានផ្ទាល់ខ្លួនរបស់អ្នក។

កម្មវិធីរុករកបង្ហាញពាក្យសម្ងាត់ដែលបានការពារនៅក្នុង Chrome

ជៀស​វាង​ប្រើកម្មវិធីដែល​អាច​បង្កគ្រោះថ្នាក់នៅលើទូរសព្ទរបស់អ្នក

ទាញយកកម្មវិធីសម្រាប់​ឧបករណ៍ចល័តពីប្រភពដែលអ្នកទុកចិត្តជានិច្ច។ ដើម្បីជួយរក្សាឧបករណ៍ Android ឱ្យមានសុវត្ថិភាព Google Play Protect ដំណើរការការពិនិត្យសុវត្ថិភាពចំពោះកម្មវិធី​​នៅលើ Google Play Store មុនពេលដែលអ្នកអាចទាញយកពួកវា និងធ្វើការពិនិត្យឧបករណ៍របស់អ្នកជាទៀងទាត់ ដើម្បីរកមើលកម្មវិធីដែលអាចបង្កគ្រោះថ្នាក់ពីប្រភពផ្សេងៗ។

ដើម្បីការពារទិន្នន័យរបស់អ្នក៖

  • ពិនិត្យមើលកម្មវិធីរបស់អ្នក និងលុបកម្មវិធីណាដែលអ្នកមិនប្រើ
  • ចូលទៅកាន់ការកំណត់ហាង​កម្មវិធីរបស់អ្នក និងបើកការដំឡើងជំនាន់ដោយស្វ័យប្រវត្តិ
  • ផ្តល់សិទ្ធិចូលប្រើទិន្នន័យរសើប ដូចជាទីតាំង និងរូបថតរបស់អ្នក ដល់កម្មវិធីដែលអ្នកទុកចិត្តតែប៉ុណ្ណោះ

ប្រយ័ត្នចំពោះការឆបោកតាមអ៊ីមែល រង្វាន់ និងអំណោយក្លែងក្លាយ

សារដែលទទួលបានពីមនុស្សចម្លែកគឺជាចំណុចគួរឱ្យសង្ស័យជានិច្ច ជាពិសេសនៅពេលដែលសារទាំងនោះមើលទៅល្អខ្លាំងពេកហួសពីការពិត ដូចជាប្រកាសថាអ្នកបានឈ្នះអ្វីម្យ៉ាង ផ្តល់រង្វាន់សម្រាប់ការបំពេញការស្ទង់មតិ ឬការផ្សព្វផ្សាយពីវិធីងាយៗក្នុងការរកប្រាក់។ កុំចុចតំណដែលគួរឱ្យសង្ស័យឱ្យសោះ ហើយកុំបញ្ចូលព័ត៌មានផ្ទាល់ខ្លួនទៅក្នុង​ទម្រង់បែបបទ ឬការស្ទង់មតិដែលគួរឱ្យសង្ស័យ។

ប្រុងប្រយ័ត្នចំពោះការស្នើសុំព័ត៌មានផ្ទាល់ខ្លួន

កុំឆ្លើយតបទៅអ៊ីមែល សារភ្លាមៗ ឬផ្ទាំងវិនដូលោតឡើងដែលគួរឱ្យសង្ស័យ ដែលស្នើសុំព័ត៌មានផ្ទាល់ខ្លួន ដូចជាពាក្យសម្ងាត់ គណនីធនាគារ និងលេខបណ្ណឥណទាន ឬសូម្បីតែថ្ងៃខែឆ្នាំកំណើតរបស់អ្នកក៏ដោយ។ បើទោះបីជាសារនោះបានមកពីទំព័រដែលអ្នកទុកចិត្ត ដូចជាធនាគាររបស់អ្នកក៏ដោយ សូមកុំចុចតំណនោះ ឬផ្ញើសារឆ្លើយតបឱ្យសោះ។ ជម្រើសដែល​ល្អគឺអ្នកគួរតែចូលទៅកាន់គេហទំព័រ ឬកម្មវិធីរបស់គេដោយផ្ទាល់ ដើម្បីចូលគណនីរបស់អ្នក។

សូមចាំថា គេហទំព័រ និងសេវាកម្មពិតនឹងមិនផ្ញើសារ ដើម្បីស្នើឱ្យអ្នកផ្ញើពាក្យសម្ងាត់ ឬព័ត៌មានហិរញ្ញវត្ថុតាមរយៈអ៊ីមែលនោះទេ។

ប្រុងប្រយ័ត្នចំពោះអ្នកបន្លំខ្លួន

ប្រសិនបើមនុស្សដែលអ្នកស្គាល់ផ្ញើអ៊ីមែលមកអ្នក ប៉ុន្តែអ៊ីមែលនោះហាក់ដូចជាចម្លែក នោះមានន័យថាគណនីរបស់គេអាចត្រូវបានគេលួចចូលប្រើ។

សូមប្រយ័ត្នចំពោះ៖

  • ការស្នើសុំប្រាក់បន្ទាន់
  • នរណាម្នាក់អះអាងថាជួបបញ្ហាអ្វីមួយមិនអាចចាកចេញពីប្រទេសដទៃ
  • នរណាម្នាក់និយាយថាទូរសព្ទរបស់គេត្រូវបានលួច និងមិនអាចធ្វើការហៅទូរសព្ទបាន

កុំឆ្លើយតបទៅសារ ឬចុចតំណនានា លុះត្រាតែអ្នកអាចបញ្ជាក់ថាអ៊ីមែលនោះពិត។

ពិនិត្យឯកសារឱ្យបានច្បាស់លាស់មុនពេលទាញយក

ការវាយប្រហារដោយការដាក់នុយដែលមានបច្ចេកទេសខ្ពស់អាចកើតឡើងតាមរយៈឯកសារ និងឯកសារភ្ជាប់ជា PDF ដែលឆ្លងមេរោគ។ ប្រសិនបើអ្នកជួបប្រទះឯកសារភ្ជាប់ដែលគួរឱ្យសង្ស័យ សូមប្រើ Chrome ឬ Google ថាស ដើម្បីបើកវាដោយសុវត្ថិភាព និងកាត់បន្ថយហានិភ័យនៃការឆ្លងមេរោគទៅក្នុងឧបករណ៍របស់អ្នក។ ប្រសិនបើយើងរកឃើញមេរោគ យើងនឹងបង្ហាញការព្រមានដល់អ្នក។

ប្រើបណ្តាញដែលមានសុវត្ថិភាព

ប្រុងប្រយ័ត្ននៅពេលប្រើ WiFi សាធារណៈ ឬឥតគិតថ្លៃ បើទោះបីជាការប្រើនោះតម្រូវឱ្យមានពាក្យសម្ងាត់ក៏ដោយ។ នៅពេលដែលអ្នកភ្ជាប់ទៅបណ្តាញសាធារណៈ មនុស្សដែលនៅជុំវិញនោះអាចតាមដានសកម្មភាពលើអ៊ីនធឺណិតរបស់អ្នកបាន ដូចជាគេហទំព័រដែលអ្នកចូលទៅកាន់ និងព័ត៌មានដែលអ្នកបញ្ចូលទៅក្នុងទំព័រនានាជាដើម។ ប្រសិនបើ WiFi សាធារណៈ ឬឥតគិតថ្លៃគឺ​ជា​ជម្រើស​តែមួយគត់របស់អ្នក នោះកម្មវិធីរុករកតាមអ៊ីនធឺណិត Chrome នឹងប្រាប់ឱ្យអ្នកដឹងនៅក្នុងរបារអាសយដ្ឋានថាទំព័រណាដែលមានសុវត្ថិភាព។

រកមើលការភ្ជាប់ដែលមានសុវត្ថិភាព មុនពេលបញ្ចូលព័ត៌មានរសើប

នៅពេលដែលអ្នករុករកលើបណ្តាញ និងជាពិសេសប្រសិនបើអ្នកគ្រោងនឹងបញ្ចូលព័ត៌មានរសើប ដូចជាពាក្យសម្ងាត់ ឬព័ត៌មានលម្អិតអំពីបណ្ណឥណទាន សូមប្រាកដថាការភ្ជាប់ទៅទំព័រដែលអ្នកចូលទៅកាន់គឺមានសុវត្ថិភាព។ URL ដែលមានសុវត្ថិភាពគឺផ្តើមដោយ HTTPS ។ កម្មវិធីរុករកតាមអ៊ីនធឺណិត Chrome នឹងបង្ហាញរូបមេសោពណ៌បៃតងដែលចាក់សោជាប់នៅក្នុងចន្លោះបំពេញ URL និងនិយាយថា “មានសុវត្ថិភាព”។ ប្រសិនបើគ្មានសុវត្ថិភាពទេ វានឹងនិយាយថា “គ្មាន​សុវត្ថិភាព”។ HTTPS ជួយធ្វើឱ្យការរុករករបស់អ្នកមានសុវត្ថិភាព ដោយភ្ជាប់កម្មវិធីរុករកតាមអ៊ីនធឺណិត ឬកម្មវិធីរបស់អ្នកជាមួយគេហទំព័រនានាដែលអ្នកចូលទៅកាន់ដោយសុវត្ថិភាព។